Chronicle of Gregory 1403-1419. 1418. The same John Bryan [Sheriff of London] scheryve unto the ix day of Octobre, and thenne he dyde; and thenne John Pernys [J Parnasse] was chose sheryve for the yere. And fro that day of Saynt Edwarde contynuyd the sege of Rone unto the xxiiij⁵³ day of Janyver, as hyt ys by-fore sayde; at the whiche day they of the cytte desyryd to trete. And the kynge (age 31) commaundyd the Erle of Warwyke, and the Erle of Salysbury, the Lorde Fehewe, Syr Watyr Hungerforde (age 39), Gylbert Houmfryvyle, John Vasquyes de Almada, and Robert⁵⁴ Knyght, to trete whythe hem. And for the party of Roone [Map] [these folowyng]:⁵⁵

Fyrste, hyt ys accordyd that Syr Gy Butler, captayne of the cytte of Roone [Map], with the consentte of the nobylle cyttezyns and of othyr dwellynge and beyng in the same cytte and castelle a-bove sayde, whythe owt fraude or malyngnynge, what tyme aftyr the myddys of the xix day of thys present monythe of Janyver, oure sayde lorde the kynge wylle that the cytte and the castelle too hym or to hys be delyveryd undyr maner and in forme whythe ynne wrytte.

Alle so hyt ys accordyd that the day and the howre⁵⁶ of that of the nobylle cyttezyns and othyr whatt soo evyr they be dwellynge and beynge in the fore sayde cytte and castelle shalle submyt hem in alle thyngys to the grace of oure excellent lorde the kyng.

Alle so hyt ys accordyd that fro thys howre⁵⁷ unto the reale and effectualle [yeldyng]⁵⁸ of the sayde cytte and castelle, none of forsayde noble cyttezyns othyr othyr⁵⁹ being in the same cytte and castelle shalle nought goo owte of the sayde cytte and castelle with owte specyalle lyscens of oure excellente lorde the kynge.⁶⁰

Alle so hyt ys accordyd that fro thys howre⁵⁷ unto the delyverans of the cytte any⁶¹ of [th]e parteys shalle abstayne hem from alle goodys⁶² of werre to make a yenste the othyr partys of hem. Alle so hyt ys accordyde that the noble cyttezeyns and othyr beynge in the cytte and castelle shalle paye to oure fore sayde lorde the kynge CCC Ml scwtys of golde, where of alle way ij of hem shalle be worthe an Englysche noble, or in stede of every scwte xxx grete blankys wyte, or xv grotys; of the whyche CCC Ml scwtys that one parte shalle be payde unto oure soverayne lorde the kynge, or unto hys deputys, whythe ynne the cytte of Roone be-fore sayde, the xxij day of thys present mony[th]e of Janyver, and the othyr halfe payde to oure sayde lorde or to hys deputys in the feste of Syn Mathie the Apostylle nexte to come, that shalle be the xxiij⁶³ day of Feverer, whythe owte any delay i-hadde, &c.⁶⁴

Alle so hyt ys accordyde that every subgett of oure sayde lorde the kynge that nowe ben or were presoners to any person in the sayde cytte or castelle, and hyr pleggys, shall be utterly fre as a-yens thes personnys, and the summys that they ar boundyn ynne, at the day of thys present trete and accorde.

Alle so hyt ys accordyde that alle and every soudyer and stranger beynge in the sayde citte and castelle shalle swere on the Evaungelys of God be-fore there departyng, that they shall not bere armys a-gayne oure sayde lorde the kynge or any of hys, unto the fyrste day of Janyver nexte to come, for no maner maundement [th]at to hem of any maner person in contrary may be done or ennyode.⁶⁵

Alle so hyt ys accordyde that alle and every jewelle, relykys, and othyr goodys longgyng to the abbaye of Synt Kateryne, whythe ynne the same cytte and castelle, beyng alle hoolly, shalle be delyveryd unto hym whom that the Kyng of Inglonde deputyn or ordeyn hem to ressayve aftyr the delyveraunce of the sayd cytte.

Alle so hyt ys accordyde that the fore sayde noble cyttezyns and othyr whythe in the sayde cytte and castelle beyng, shalle make the same cytte and castelle be-fore the sayde xix daye of this present monythe of Janyver suffycyantly and honestely to be made clene, and alle so honestly and diligently that alle the dede bodys newe dede or to ben dede in to that daye of delyveraunce of the cytte honestely and dylygently shalle ben beryd.

Alle soo hyt ys accordyd that the for sayde noble cyttezyns and alle beynge in the sayde citte and castelle anon shalle receyve⁶⁶ and don entre in to the same cytte and castelle alle and everyche beynge in the dychys⁶⁷ of the sayde cytte that for penurye⁶⁸ went owte of the same cytte whom⁶⁹ they shalle be holde to fede unto the xix day of Janyver above sayde, as they wylle answere unto Gode and the kyng; and owte takyn them they shalle not ressayve non othyr personnys in to the same cytte or castelle unto the forsayde day with owte specyalle lyssens of oure moste dowtfulle lorde the Kyng of Inglonde. But yf hit happe any massyngere or harowde of armys of the adversy party of the kynge to come to the partys of [th]e gatys or dychys of the sayde castelle and cytte . . .⁷⁰

Whiche⁷¹ artyculys and appoyntmentys, as hyt ys before sayde, alle and every chone in maner as hyt ys accordyd, the forsayde captaynys and the noble cyttezyns ande othyr whythe ynne the sayde castelle and citte being, welle and trewly whythe owte any fraude or malygny⁷² to holdyn ande observe and kepe they be-hote, ande thoo two be kepte and fullefyllyd they bynd them soo, but yf yt be falle oure sayde moste doughtefulle lorde the kynge, that God for bede, to ben ovyr come in the batayle to hym i-made by Charlys hys adversarye of Fraunce or the Duke of Burgayne, be-fore the for-sayde [xix]⁷³ day of thys present monythe of Janyver; for to sen⁷⁴ alle way that [if]⁷³ hyt be falle the forsayde Charlys adversary, othyr the Duke of Burgayne, or any othyr, to come to the sege of oure kynge to remoeve⁷⁵ fro the forsayde cytte, that nothyr the fore sayde captayne nor non of the cyttezyns, sowdyers, othyr othyr⁷⁶ beyng whythe ynne the for sayde cytte or castelle, shalle goo owte, nor noo maner helpe they shalle delyverye nor lene to hem, so azens oure lorde the kynges comyng in nomaner a wyse.

Alle so, that alle thes maner of poynttementysse, covenauntys, and accordys, and every poynte as hyt ys a fore sayde, welle and trewly and unbrokyn to be kepte; and for the more surete of the same covenauntys and accordys, the for sayde captayne, the noble cyttezyns, and othyr above sayde shalle ben takyn in thys tyme anone into the hondys of oure lorde the kynge iiij schore notable plegys, where of xxty shalle be knyghtys and squyers, ande the remenaunte cyttezyns of the same cytte, att hyr owne coste to be sustaynyd. For the party sothely of oure moste doutefulle lorde ande kynge a-fore sayde, gracyusly and benyngly consederynge the meke submyttynge and yeldynge of the sayde citte and castelle above sayde, he hathe grauntyde that alle and everye person of what a-state or degre that he be of condycyon with ynne the sayde castelle [and cite]⁷⁷ beyng, [excepte]⁷⁷ sartayne personys with ynne expressyde, that wylle be-come legys and subgetys to oure lorde the kynge, and fro hensforthe wylle dwelle undyr his obessauns, they shalle have there herytagys and goodys, mevablis and unmevablys, whythe ynne hys duche of Normandy constitute; and whiche that benne afore the day and date of thys present letters by oure fore sayde lorde the kynge to⁷⁸ othyr personys have nought be yovyn and grauntyde, excepte armours artyrlys a-bove sayd; makyng and doyng [for]⁷⁷ hyr herytagys, and for hyr unmevabylle goodys to oure for sayde lorde the kynge, the services⁷⁹ ther-of dewe and consuete, or to swere to whom suche maner of servyce of the graunte of oure lorde the kynge ought too long.

Alle so hyt ys agrauntyd of oure lorde the kynge ys be-halve, that alle the cyttezyns and dwellers of the cytte of Roone that nowe be, or in tyme to come shalle be, [and]⁸⁰ shall have alle ande every franches, lybertes, and prevelegys [th]e whiche of worthely mynde be progenys of oure lorde the kynge, of kyngys of Inglonde, dukys of Normandye, to hem and to hys sayde cytte were grauntyde, in possessyon where [of]⁸¹ they were the fyrste day that oure lorde the kynge a-fore sayde come by fore the sayde cytte; and alle so of more large grace of hys benyngnyte hathe grauntyde, that the same cyttezyns and dwellers of the citte shalle have alle the lyberteys, and franches, and prevelegys, where they were in pos sessyons on the fore sayde fyrste day of comynge of oure lorde the kynge before the cytte, of the graunte of hys progenytourys of kyngys of Fraunce that were before tyme of Phylyppe Valeys, adversarye of oure lorde [the kyng].⁸¹

[Also it is grauntid and accordid in our lord] the kyngys behalve, that alle the strangers, sowdyers, and othyr in the fore sayde citte and castelle, beynge at thys tyme nought wyllynge to be come leges of oure lorde the kyng, the for-sayde citte so yoldynne as hit ys before sayde, to departe, levynge to oure sayde lorde the kyng all hyr armowrys, hors, artylyrs, and othyr thyngys, harneysse, and goodys, excepte the Normandys that wylle nought be lyges of oure lorde the kynge, [th]at thoo alle shalle a-byde presoners of oure lorde the kyng.

Alle so hyt ys grauntyd in oure lorde the kynges behalve, that the werre and alle so schrewde speche that duryng the sege the folke and pepylle nemnyd, of what condycyon that they ben, ayens hys ryalle soveraynyte, or whythe defame lyppys have spoke, oure moste soverayne lorde the kyng, of strenyger the day of parte⁸² mekely shalle be forgevynne, owte take the personys that above in specyalle ben exceptyd.⁸³

Alle so hyt ys accordyd in oure lorde the kyngys be halve, that the for sayde soudyers and strongers be-fore thys presentt trete and accorde, wyllyng for to departynne, oure lorde the kyng shalle ordaynne and make a sykyr and saffe condyte in form consuete.

And so the fore sayde cytte was yoldyd to oure soverayne lord the kynge uppon Synt Wolstonys day.⁸⁴ And aftyr that he gatte many townys and castellys, as hyt shalle aftyr thys be wretyn alle the processe.

Note 53. Should be the 13th.

Note 54. Robert. Robesard, J.

Note 55. [these folowyng]. Omitted in MS.; supplied from J. Nevertheless it is clear there is a further omission, even in J.

Note 56. howre. The hof this word is struck out in all these places.

Note 57. See notee, p. 122.

Note 58. Omitted in MS.; supplied from J.

Note 59. So in MS. The first "othyr" seems to mean "or."

Note 60. This clause is repeated in the MS. with the variation, "non of the fore sayde cyttezyns or othyr."

Note 61. any. every, J.

Note 62. goodys. Evidently a transcriber's error for dedys. J. reads dede.

Note 63. xxiij. Should be 24th. See Rymer, ix. 665.

Note 64. Here several articles are omitted which may be seen in Rymer. They are given in the English in J.

Note 65. enjoined.

Note 66. receyve. resome, MS.; receyve, V.; receyven, J.

Note 67. or about diches, J.

Note 68. penurye. femurye, MS.; penurie, J. Vit. reads "fere."

Note 69. whom. whanne, MS.

Note 70. The conclusion of the sentence is omitted not only in our MS. but also in J. and V. In the Latin it is, "ipse in ipsa non recipietur, seu providebitur eidem per dominum nostrum Regem de salvo conductu."

Note 71. Whiche. The MS. has "with the" written as if it were the continuation of the previous sentence.

Note 72. malygny. malengyne, J.

Note 73. Omitted in MS.; supplied from J.

Note 74. for to sen, i. e. foreseen, provided.

Note 75. remoeve. remayne, MS., corrected from J.

Note 76. See page 123, notec.

Note 77. Omitted in MS.; supplied from J.

Note 78. to. and, MS.; corrected from J.

Note 79. services. sermoys, MS.

Note 80. This word is clearly superfluous.

Note 81. The end of this sentence and the beginning of the next are omitted in our MS., which runs on without a break from the word "lorde" to "the kyngys behalve' as if it were one sentence.

Note 82. of strenyger the day of parte. of steryng the day of pietie, J. These are strange corruptions. The Latin has ex instinctu Divinæ pietatis.

Note 83. They are mentioned in the preceding clause in the original treaty; but their names are omitted in the MS.

Note 84. 19th Jan.