Warkworth's Chronicle 1473. 25 Apr 1472. Also this yere, or a lytelle before, George the Archebysshoppe of Yorke (age 40), and brother to the Erle of Warwyke, was withe Kynge Edwarde at Wynsoure, and huntede, and hade there ryghte good chere, and supposid he hade stonde in grete favour with the Kynge: for the Kynge seid to the sayde Archebyschope that he wuld come for to hunte and disporte withe hyme in his manere at Moore; whereof he was ryghte glade, and toke his leve and went home to make purvyaunce therfore; and fett oute of Londone, and dyverse other places, alle his plate and othere stuffe that he hade hyde after Barnet felde and Teukysbury feld; and also borowede more stuff of other menne, and purveyde for the Kynge for two or iij. dayes for mete and drynke and logynge, and arayed as rychely and as plesauntly as he coude. And the day afore the Kynge schulde have comyne to the Archebysshoppe, to the seid manere of Moore, whiche the saide Archebisshoppe hade purchasshed and byllede¹ it ryghte comodiusly and plesauntly, the Kynge send a gentylman to the seide Archebisshoppe, and commaundyd him to come to Wyndsoure to hyme; and asone as he came he was arested and apeched of hye treysone, that he schuld helpe the Erle of Oxenforde; and anone ryght he was put to warde. And forthewithe Sere William of Parre, knyghte, and Thomas Vaghan, squyre, withe othere many dyverse gentilmenne and yomen, were sent to the seide manere of Moore; and ther by the Kynges comawndement seysede the seid manere into the Kynges handes, and alle the good that was therin, whiche was worthe xx. M^l. or more, and alle other lordschippes and landes that the seid bysshoppe hade withein Englonde, and alle his stuff and rychesse withein alle his lordschippes; and sent the same bisschoppe overe the see to Caleis, and from thens to the castelle of Hammys, and ther he was kepte presonere many a day; and the Kynge alle that seasone toke the prophete of the Archebysshopperyche, &c. And anone after the Kynge brake the seyd Archebysschoppes mytere, in the whiche were fulle many ryche stones and preciouse, and made therof a croune for hyme self. And alle his other juels, plate, and stuff, the Kynge gaff it to his eldest sonne and heyre Prynce Edward: for the sayd Archebisshoppe hade be Chaunselere of Englond many dayes, and he and his brotheres hade the reule of the lande, and hade gaderyde grete rychesse many yeres, whiche in one day was lost; and alle be the hye jugement of ryghtwisnes (as many manne seide be hym) for his grete covetousenes, and had no pyte of Kynge Harry menne, and was cause of many mannys undoynge for Kynge Edwardys sake, if he myghte gete any good by hym. Wherefore suche goodes as were gaderide with synne, were loste with sorwe. And also menne supposid for cause he was duble to Kynge Herry, and kepte hym in Londone, where he wulde a be at Westmynstere, he hade a lettere send frome Kynge Edward to kepe hym oute of sanctuary, and he hade his charture send hym; where he had be a trewe manne to Kynge Herry, as the comons of Londone were, Kynge Edward hade not comene into Londone afore Barnet felde, &c.

Note 1. Hade purchased and byllede. Moor Park in Hertfordshire, now the seat of the Marquess of Westminster. Clutterbuck (History of Hertfordshire, i. 191) states that the Archbishop had license to inclose 600 acres of pasture and land in Rickmersworth and Watford for a park, and to embattle the site of the manor of Moor in Rickmersworth; and quotes for authority Pat. 9. H. VI. m. 10; but George Neville was then unborn, and on further inquiry we find that the grant was made five years earlier, to Henry (Beaufort) Bishop of Winchester: "Quod Henr' Ep'us Winton' et alii possint kernell' manerium suam de More in Rickmansworth, ac imparcare sexcent, acras terræ, & c. ac liber' warrenn [That Bishop Henry of Winchester and others may enclose their manor of More in Rickmansworth, and impark six hundred acres of land, etc., and have free warren there].' ib'm " 2 Pat. 4 Hen. VI. m. 10.-J.G.N.