Chronicle of Gregory 1451-1460. 24 Mar 1458. Ande thys same yere at Covyntre there was made a pesse [Note. peace] by-twyne the Duke of Somersett Harry (age 22), and the Earl of Saulysbury (age 58), and the Erle of Warwycke (age 29), for the dethe of hys fadyr Duke of Somersette, that the Duke of Yorke (age 46) put to dethe at Synt Albonys. And thys tretys was made at Covyntre, in the holy tyme of Lentyn, by the mene of Kyng Harry the VI. And alle that holy tyme of Lentyn there myght noo mane man that shulde preche by-fore the kynge, but that he shulde shewe hys sarmon in wrytyng, were he docter or other, in so moche the lordys woldys A B C wolde assygne what he schulde say, as for any thynge that longyd unto the comyn wele, and yf he passyd hyr commaundement he schulde lese hys costys, and goo as he come, withowte mete and drynge. But a becheler of holy devynyte come to that cytte, and whenn he come to preche byfore the kyng, as Maystyr Wylliam Saye, Dene of Poulys and Dene of the kyngys chapylle, hadde desyryd and asygnyd, A B C axyd hys name, and hys name was Mayster Wylliam Ive, at that tyme beyng at Wynchester in Wycham ys college. And A B C sayde that they moste nedys se hys sarmon and hys purposse, that he was a vysyd to say by-fore the kynge the Sonday nexte comynge. And he fulle goodly toke them hys papyr; and they seyng and redynge hys papyr, commaundyd to leve owte and put a way many troughtys. But that same Mayster Wylliam Ive sayde but lytylle, but whenn he come to pulpyt he sparyd not to sayd the troughthe, and reportyd by-fore the kyng that A B C made the sarmonys that were sayde fore, and not thoo that prechyd, and that causyd that þe men that prechyd hadde but sympylle sarmons, for hyr purposse was alle turnyde upsodowne 3 and that they hadde made love days as Judas made whythe a cosse^b with Cryste for they cyste ovyr the mane. The grete rewarde that he hadde for hys labyr was the rydyng of viij xx myle yn and owte for hys travayle, and alle hys frendys fulle sory for hym. But qui veritatem dicit caput fractum habebit, &c. And that same yere alle thes lordys departyd from the Parlyment, but they come nevyr alle togedyr after that tyme to noo Parlyment nor conselle, but yf hyt were in fylde with spere and schylde.

Note b. kiss.