Chronicle of Gregory 1461. Ande the xvij day nexte folowynge Kyng Harry (age 39) roode to Synt Albonys [Map], and the Duke of Northefolke (age 45) with hym, the Erle of Warwycke (age 32), the Erle of Arundelle (age 43), the Lord Bouser (age 30), the Lord Bonvyle (age 68), with many grete lordys, knyghtys, and squyers, and commyns of an C [Hundred] Ml men. And there they hadde a grete batayle whythe the Quene (age 30), for she come ever on fro the jornaye of Wackefylde tylle sche come to Synt Albonys, with alle the lordys a fore said; and her mayny and every lord is men bare her lordys leverey, that every man mighte knowe his owne feleschippe by his lyverey. And be-syde alle that, every man and lord bare the Pryncys (age 7) levery, that was a bende of crymesyn and blacke with esteryge is fetherys. The substance that gate that fylde were howseholde men and feyd men. I wene there were not v Mlmen that fought in the Quenys party, for [t]emoste parte of Northeryn men fledde a-way, and some were take and spoylyd out of her harnysse by the way as they fledde. And some of them robbyd evyr as they yede, a petyffulle thynge hit is to hyre hit. But the day before that batayle there was a jornay at Dunstapyl [Map]; but the kyngys mayny lackyd good gydyng, for some were but newe men of warre, for the chevyste captayne was a boucher of the same towne; and there were the kyngys mayny ovyr throughe only by the Northeryn men. And son aftyr the bocher, for schame of his sympylle gydynge and loste of the men, the nombyr of viij C, for very sorowe as it is said, hynge him selfe; and some men said that it was for loste of his goode, but dede he ys-God knowythe the trought.

And in the myddys of the batayle King Harry wente unto his Quene and for-soke alle his lordys, ande truste better to her party thenne unto his owne lordys. And then thoroughe grete labur the Duke of Northefolke and the Erle of Warwycke a schapyd a-waye; the Byschoppe of Exceter (age 29), that tyme Chaunceler of Ingelond, and brother unto the Erle of Warwycke, the Lord Bouser, whythe many othyr knyghtys, squyers, and comyns fledde, and many men slayne in bothe partys. And the Lord Bonevyle was be-heddyd, the common sayynge that his longage causyd him to dye. The Prynce was jugge is owne sylfe. Ande ther was slayne that manly knyght Syr Thomas Keryel (age 65). The nomber of ded men was xxxv C an moo [t]at were slayne. The lordys in Kyng Harrys party pycchyd a fylde and fortefyd it full stronge, and lyke unwyse men brake her raye and fyld and toke a-nothyr, and or that they were alle sette a buskyd to batayle, the Quenys parte was at hond whythe them in towne of Synt Albonys [Map], and then alle [t]yng was to seke and out of ordyr, for her pryckyers come not home to bryng no tydyng howe ny that the Quene was, save one come and sayd that she was ix myle of. And ar the goners and borgeners couthe levylle her gonnys they were besely fyghtyng, and many a gynne of wer was ordaynyd that stode in lytylle a-vayle or nought; for the burgeners hadde suche instrumentys that wolde schute bothe pellettys of ledde and arowys of an elle of lenghthe with vj fetherys, iij in myddys and iij at the othyr ende, with a grete mighty hedde of yryn at the othyr ende, and wylde fyre with alle. Alle thes iij thyngys they might schute welle and esely at onys, but in tyme of nede they couthe not schut not one of thes, but the fyre turnyd backe a-pon them that wold schute this iij thyngys. Also they hadde nettys made of grete cordys of iiij fethem of lengthe and of iiij fote brode, lyke unto an haye, and at every ij knott there was an nayl stondyng uppe ryght, that there couthe no man passe ovyr it by lyckely hode but he shulde be hurte. Alle so they hadde pavysse bore as a dore i-made with a staffe foldynge uppe and downe to sette the pavys where the lykyd, and loupys with schyttyng wyndowys to schute out at, they stondyng by hynde [t]e pavys, and the pavys as full of iijdnayle aftyr ordyr as they might stonde. And whenn her schotte was spende and done they caste the pavysse by-fore hem, then there might noo man come unto them ovyr the pavysse for the naylys that stode up-ryghte, but yf he wolde myschyffe him sylfe. Alle so they hadde a thynge made lyke unto a latysse full of naylys as the net was, but hit wolde be mevyd as a man wolde; a man might bryse it to-gedyr that the lengythe wolde be more then ij yerdys long, and yf he wolde he might hale it a brode, then hit wolde be iiij square. And that servyd to lye at gappys there at horsemen wolde entyr yn, and many a caltrappe. And as the substaunce of men of worschyppe that wylle not glose nor cory favyl for no parcyallyte, they cowthe not undyrstond that alle this ordenaunce dyd any goode or harme but yf it were a mong us in owre parte with Kyng Harry. There fore it is moche lefte, and men take them to mallys of ledde, bowys, swyrdys, gleyvys, and axys. As for speremen they ben good to ryde be-fore the foote men and ete and drynke uppe her vetayle, and many moo suche prety thyngys they doo, holde me excusyd thoughe I say the beste, for in the fote men is alle the tryste.